Nuognē poiki dėina Kuliū gėmnazėjuo bova ketvėrtadėinis, lapkrėtė 24-uoji – vėsė pradėnuokā so sava mokītuojuom bova sosėrinkėn aktu salie, kor dainiava i rokavuos žemaitėškā, žaidė vėsuokius žaidėmus, šuoka ratelius, pasakuojė anėkduotus i dar šīn tōn dėrba. Vėskas dėl tuo, ka 2022-ėje metā Plungės i kėtuos savėvaldībies ī paskelbtė Žemaitiu kalbuos metās!
Nanoriedamas, ka vakā ožmėrštu žemaitiu kalba, pradėnuoku mokītuojės somėslėjė projektėnė dėina, skėrta Žemaitiu kalbuos metams. Bėški pasėtarosės, kėkvėina prėmėslėjė vėsokiūm linksmū ožsėjėmėmu.
Tōn dėina, nu pat rītmetė, vėsė 1–4 klasiu mokėnē ejė na i pamuokas, vo i aktu salė. Bova i dėrektuorė so pavaduotojė atejosės pasėveizietė i pasėcėkavītė, kāp tėi pradėnuokā buovėjes.
Sosėrinkosius gražē žemaitėškā pasveikėna mokītuojė Simėnienė Vida, paokatėjė vėsus ėšlėktė tėkrās žemaitēs i vėsumet mīlietė sava kalba!
Pasėruodīmus pradiejė patīs mažiausė – pėrmuokā. Vėina mergelė – Mineikītė Saulė – nasenē bova dalīvavusi žemaitėšku skaitīmu konkursė „Skaitimā žemaitėškā“ Plungės bėbliuotekuo, no tad ana dėdelē poikē padeklamava tōn pati eilierašti „Mona dvėratis“. Paskiau pėrmuokā so sava mokītuojė Motužienė Lina mokėna vėsus žaistė do žaidėmo: „Žiožis“ i „Nešu nešu kiauši“.
Ontruoku mokītuojė Pieškuvienė Jolanta atejė dėdelē pasėstrajėjusi – bova so žemaitėšku kuostiumu! Ana īduomē vėskōn papasakuojė i kvėitė vākus pademonstroutė atsėneštus apriedus. Dar ontruokā vėsus pamuokė ratieliu, katrėi dėdelē senē bova ožrašītė Kuliūs: „Gol žvėrblis šalėp koknės“ i „Mergelė siūlus vīniuojė“.
Trečiuokā so sava mokītuojė Šiaudvirtienė Diana bova ėšmuokėn vėsokiūm īduomiu žemaitėšku puosakiu. Paskiau anėi dainiava dainelė „Griūšē i vobolā“, šuoka ratieli „En žėidītis“ i dainiava lopšėnė „Zo-zo rikiška“.
Dvė ketvėrtuoku klasės – 4a i 4b – ėrgi bova na ėš kelma spėrtas. Dėčkē so sava mokītuojuom Simėnienė Vida i Malakauskienė Regina paruodė, kāp šuoktė ratelius „Žīd vobelelė“, „Katėns jouds“, „Verdu bulvīnė“, „Ėšvažiava buočius“. Dar ketvėrtuokā i anekduotu žemaitėškā soskielė!
Vėinu tarpu bova pasėruodės i tuoks majednus svetīs – ons mokiejė namažā poetės Lengvenienės Bėrutės eilieraštiu (mokītuojė Malakauskienė Regina).
Poikus rėnginīs baigies žemaitėškas dainuos klausīmu i pasėsiubavėmu sosėkėbus vėsīms ož paronkiu. Vo paskiau lėkosės pamuokas sava pradėnuokams mokītuojės vedė šnekiedamas tiktā žemaitėškā.
